குழந்தைச் செல்வம்/காலைப் பாட்டு

by கவிமணி தேசிக விநாயகம் பிள்ளை

4. காலைப் பாட்டு

அருணன் உதித்தனன்; அம்புஜம் விண்டது;
      அளிகளும் மொய்த்தன ; பாராய்!
      அம்மா ! நீ எழுந்தோடி வாராய்! 1

பசிய புல் நுனியில் பதித்த வெண் முத்தமோ?
      பனித்துளி தானோ? நீ பாராய்!
      பைங்கிளி! எழுந்தோடி வாராய்! 2

பொழுது விடிந்தது; பொற்கோழி கூவிற்று:
      பூஞ்செடி பொலிவதைப் பாராய்!
      பொன்னே! நீ எழுந்தோடி வாராய்! 3

காகம் கரைந்தது; காலையும் ஆயிற்று;
      கனியுதிர் காவினைப் பாராய்!
      கண்ணே ! நீ எழுந்தோடி வாராய்! 4