51. சிறுமியர் பொழுதுபோக்கு
காலத்துக் கேற்ற உடையணிவோம் - வாசம்
கட்டிய சந்தனம் பூசிடுவோம்;
கோலமாய்ச் சீவிச் சிணுக்கெடுத்து - மலர்
கூந்தலிற் சூட்டி அழகுசெய்வோம்.
1
பந்துகள் ஆடிப் பழகிடுவோம் - கழல்
பாங்கியர் தம்மொடும் ஆடிடுவோம்;
சந்தம் எழக் கும்மி பாடிடுவோம் - சுற்றிச்
சப்பாணி கொட்டிச் சிரித்திடுவோம்.
2
ஓடி ஒளித்துக் களித்திடுவோம் - நாங்கள்
ஒற்றை இரட்டையும் வைத்திடுவோம்;
நாடியே வட்டுகள் ஆடிடுவோம் - தோழீ
நாணக்கண் பொத்தி நகைத்திடுவோம்.
3
உன்னி யெழும் ஊஞ்சல் ஆடிடுவோம் - கேட்போர்
உள்ளம் குளிரவே பாடிடுவோம்;
சின்னஞ் சிறுவீடு கட்டிடுவோம் - அதில்
சித்திர வேலைகள் செய்திடுவோம்.
4
52. தேசக் கொடி
பாரில் உயர்ந்தமலை இமயமலை - அன்னை
பாரத தேவி பராட்டுமலை;
சீரில் உயர்ந்திடுநம் தேசக்கொடி - அதன்
சிகரம் அணிந்தின்று பறக்குதுபார்!
1
வீரர் துணிந்தேறி நட்டகொடி - இது
வெற்றி விருதா யெடுத்தகொடி.
யாரும் இறைஞ்சி வணங்கும் கொடி-நமக்கு
என்றும் சுதந்திரம் ஈட்டும் கொடி.
2
