61
இவ்விருள்மலம், உயிர்களை அனாதியே பற்றியுள்ள தென்பதனைவிட இடையில் வந்தேறியது எனக் கூறலாகாதோ என வினவிய மாணாக்கர்க்கு, மலம் அனாதி என அறிவுறுத்துவது அடுத்துவரும் குறட்பாவாகும்.
28. ஆசாதி யேலணைவ காரணமென் முத்திநிலை
பேசா தகவும் பிணி.
இ-ள்: அவிச்சை இடையிட்டு வந்ததாயின், அஃதோர் காரணமில்லாமல் வந்து பொருந்திய தென்னை? அன்றி முத்தியினும் உரையாடாது வந்து கவர்ந்து கொள்ளுமன்றோ என்க.
உரையாடாத கவர்தல், தோன்றாது விரைவிற் கவர்தல் இதனால் அவிச்சை ஆதி என்பாரை மறுத்துக் கூறப்பட்டது.
விளக்கம்: இருள்மலம் அனாதி என்பது உணர்த்துகின்றது.
ஆசு ஆதியேல் அணைவகாரணம் என்? முத்திநிலை{யினும் பிணி பேசாது அகவும் என இயைத்துரைக்க. ஆசு-(ஆணவ மலமாகிய) அழுக்கு; அவிச்சை. ஆதி-முன் ஒருகாலத்தில் இல்லாதிருந்து இடையே ஒருகாலத்தில் வந்து தோன்றியது. இடையே தோன்றியதன்றி முன்னமேயுள்ளதனை அனாதி என வழங்குவர். முத்தி நிலையினும் என உருபும் உம்மையும் விரித்துப் பொருளுரைக்கப்பட்டது. பேசாது அகவுதல், உரையாடாது கவர்தல்; என்றது. எத்தகைய முன்னறிவிப்பு மின்றி விரைவில் வந்து பற்றிக்கொள்ளுதல். இனி முத்தி நிலை பேசாது எனவும் பிணி அகவும் எனவும் இயைத்து, மோட்ச நிலையுண்டென்று சொல்லவேண்டுவதில்லை; பிணி மீளவும் வந்து பொருந்தும் எனப் பொருளுரைப்பர் சிந்தனையுரையாசிரியர்.
