பக்கம்:தூரன் கவிதைகள்.pdf/126

வீரன் குமரன்

காந்தியடிகள் தோற்றுவித்த சாத்விகப்போர் எத்தனையோ பேரை வீரர்களாகவும் தியாகிகளாகவும் செய்தது. அப்போரில் பங்குகொண்டு உயிர்த்தியாகம் செய்தவர்களில் திருப்பூர்க் குமரனும் ஒருவர். அந்தத் தியாக வரலாறு இங்கு கூறப்படு கிறது.

"அன்பின் வடிவமாம் அன்னையே-உன்றன்
அடிமலர் வாழ்த்தி வணங்கினேன்;
இன்பமு டன்விடை நல்குவாய்-நானும்
என்பணி தேசத்திற் காற்றுவேன்"

என்று குமரன் பணிந்திடத்-தாயும்
இளநகை செய்துரை யாடுவாள்:
"நன்றுகு றித்தனை மைந்தநீ-வளம்
நாடும் திருப்பூரின் செல்வமாம்;

சாத்விகப் போரெனில் தைரியம்-நெஞ்சில்
சாலவும் வேண்டும்நீ கொண்டுளாய்;
ஆத்மிக சக்தியும் அன்பறம்-வெல்ல
ஆருயிர் ஈந்தும் கடன்செய்வாய்:

தேடற் கரிய மகாத்மாவை-இந்தத்
தேசத் தலைவராய்ப் பெற்றுளோம்;
பாடற் கரிய தமிழ்மகன்-புகழ்
பாரெங்கும் வீசிடச் செல்லுவாய்.”

128