நெய்தல்
257
166. நல்ல வாயின கண்!
துறை : வரையாது வந்தொழுகும் தலைமகன் சிறைப்புறத் தானாகத், தலைமகள் பசப்பிற்கு வருந்திய தோழி, அவனை இயற்பழித்துக் கூறியது.
[து .வி.: வரைதலை நாடாது, களவையே நாடி வந்து போகும் தலைவனின் போக்குக்கண்டு வருந்திய தோழி, அவன் சிறைப்புறத்தானாதல் நோக்கி, அவன் உள்ளம் தெளியுமாறு, அவனை இயற்பழித்துக் கூறியது இது.]
பெருங்கடற் கரையது சிறுவெண் காக்கை
வரிவெண் டாலி வலைசெத்து வெரூஉம்
மெல்லம் புலம்பற் றேறி
தெளிவுரை: பெரிய கடற்கரைக் கண்ணதான சிறுவெண் காக்கையானது, வரிகள் பொருந்திய வெள்ளிய பலகறைகளை வலையென்றே நினைத்து அஞ்சும், மென்மையான கடற்கரை நாட்டோன் தலைவன். அவன் சொற்களை வாய்மையாயினவாம் என்று தெளிதலாலே, இந் நல்லோளின் கண்களும், இதுகாலை பசலைபடர்ந்து, நல்லழகு பெற்றவை ஆயினவே!
கருத்து: 'அவன் அறத்தொடு வாய்மை பேணாதான்' என்றதாம்.
சொற்பொருள் : வரி - கோடுகள். தாலி - பலகறை; வலைகள் நீரினுள் அமிழ்ந்து மீனை வளைத்துப் பிடிக்க உதவுவது; தாலி என்றது அது தொங்குதலால். தேறி - தெளிந்து; சூளுரைகளை வாய்மையெனக் கொண்டு.
விளக்கம் : 'நல்லவாயின' என்றது எதிர்மறைக் குறிப்பு. அவன் பேச்சை அப்படியே நம்பி அவனொடும் காதன்மை கொண்டதன் பயனாலே, இவள் கண்கள் தம் பழைய அழகு நலம் கெட்டன என்பதாம். நல்லோள் - நல்ல அழகும் பண்பும் உடைய தலைவி.
உள்ளுறை : 'வரிவெண் தாலியை வலையெனக் கொண்டு சிறுவெண் காக்கை அஞ்சும்' என்றது, அவ்வாறே தலைவனும் தலைவியை வரைந்துகொள்வது தன் சுதந்திரத்தைக் கட்டுப்படுத்தும் என்று கருதினன் என்று உள்ளுறுத்துக் கூறியதாம். அவன் பொறுப்பற்ற தன்மை சுட்டிப் பழித்ததும் இது.
ஐங். -- 17
