தமிழியக்கம்/விழா நடத்துவோர்

by பாரதிதாசன்

⁠௧௪. விழா நடத்துவோர்

தேர்வரும் பின் பார்ப்பனர்கள்
    வரிசையுறச் செங்கைகள்
        கோத்த வண்ணம்,
நீர்வருங்கால் கத்துகின்ற
    நெடுந்தவளைக் கூட்டமெனக்
        கூச்ச லிட்டு
நேர்வருவார் அன்னவர்கள்
    நிகழ்த்துவதன் பொருளென்ன?
        இனிமை உண்டா?
ஊர் வருந்தும் படி இதை ஏன்,
    விழாத்தலைவர் உடன்சேர்த்தார்?
        ஒழிக்க வேண்டும்! ⁠66

பல்லிசைகள் நேர்முழங்கப்
    பகல் போலும் விளக் கெடுப்பக்,
        குதிரை, யானை
நல்ல சிறப் பளித்துவர,
    நடுவி லொரு தேவடியாள்
        ஆட, மக்கள்
எல்லாரும் கயிறிழுக்க
    இயங்குமொரு தேர்மீதில்
        ஆரியத் தைச்
சொல்லிடுமோர் சொரிபிடித்த
    பார்ப்பானைக் குந்தவைத்தல்
        தூய்மை தானோ!⁠67

விவாகசுப முகூர்த்தமென
    வெளிப் படுத்தும் மண அழைப்பில்
        மேன்மை என்ன?
அவாள் இவாள் என்றுரைக்கும்
    பார்ப்பனரின் அடிதொடர்தல்
        மடமை யன்றோ?
உவகைபெறத் தமிழர்மணம்
    உயிர்பெறுங்கால் உயிரற்ற
        வடசொற் கூச்சல்
கவலையினை ஆக்காதோ!
    மணவிழவு காண்பவரே
        கழறு வீரே! ⁠68

மானந்தான் மறைந்ததுவோ?
    விழாத்தலைவீர், மணமெல்லாம்
        வடசொல் லாலே
ஆனவையா சொல்லிடுவீர்!
    அந்நாளில் தமிழர்மணம்
        தமிழ்ச்சொல் லாலே
ஆனதென அறியீரோ?
    பார்ப்பனன்போய் அடிவைத்த
        வீட்டி லெல்லாம்
ஊனந்தான் அல்லாமல்
    உயர்வென்ன கண்டுவிட்டார்
        இந்நாள் மட்டும்? ⁠69

மணமக்கள் தமைத் தமிழர்
    வாழ்க என வாழ்த்துமொரு
        வண் தமிழ்க்கே
இணையாகப் பார்ப்பான்சொல்
    வடமொழியா, தமிழர்செவிக்
       கின்பம் ஊட்டும்?
பணமிக்க தலைவர்களே,
    பழியேற்க வேண்டாம்நீர்!
       திரும ணத்தில்
மணமக்கள், இல்லறத்தை
    மாத்தமிழால் தொடங்கிடுக;
        மல்கம் இன்பம்! ⁠70