குழந்தைச் செல்வம்/ஆகாய விமானம்

by கவிமணி தேசிக விநாயகம் பிள்ளை

30. ஆகாய விமானம்

கப்பல் என்றுமே - மெல்லக்
     கடலில் நீந்துவதாம்;
தப்பித் தப்பியே - ரயிலும்
     தரையில் ஊருவதாம். 1

வானமீ தெழுவேன் - அங்கே
      வட்டம் சுற்றிடுவேன்;
கானம் மலையெல்லாம் - யான் ஓர்
      கணத்தில் தாண்டிடுவேன். 2

இடைவிடாது தபால் - உலகில்
      எங்கும் கொண்டுசெல்வேன்;
சடைவி லாமலே - பலரைத்
      தாங்கியும் போவேன். 3

நன்மை செய்ய வந்தேன் - அதை
      நன்குண ராமல்,
வன்மைப் போரில்எனை - இழுத்து
      மாட்டி விட்டார், ஐயோ! 4

தீவினை செய்ய - என்னைத்
      தினமும் ஏவுகிறார்;
பூவுலக மெல்லாம் - சுட்டுப்
      பொசுக்கச் சொல்லுகிறார். 5

அன்பைக் கொன்றுவிட்டார்; - மனிதர்
      அரக்கர் ஆகிவிட்டார்;
துன்பம் செய்திடவே - இன்று
      துணிந் திறங்கிவிட்டார்.

ஆசைப் பேயெங்கும் - தலைவிரித்து
     ஆடு கின்றதையோ !
நாச காலம் ஐயோ!-புவியும்
     நரக மாகுதையோ! 7

காட்டில் ஓநாயும் - நரியும்
     கடுவாயும் புலியும்
நாட்டு நாகரிகம் - கண்டு
     நகைக்க லாச்சுதையோ! 8

சாந்த மூர்த்தியின்^[1] - அகிம்சா
     தருமம் மேற்கொண்டு
மாந்தர் இவ்வுலகில் - நன்றாய்
     வாழ்வ தெந்நாளோ? 9

---

1. 9. சாந்த மூர்த்தி - காந்தி யடிகள்.