கனிச்சாறு 1/060-089
57 தமிழைக் கொல்லும் மூடர்களே!
கலப்புத் தமிழும் தமிழாமோ? - இழி
கயமைச் செயலும் செயலாமோ?
அலப்புச் சொல்லும் இசையாமோ? - வீண்
ஆரவாரமும் வாழ்வாமோ?
கொச்சைத் தமிழும் தமிழாமோ? - கடுங்
கொடுமை உரையும் உரையாமோ?
பச்சைச் சொல்லில் பாலுணர்வைத் - தாள்
பதிக்கும் இதழும் இதழாமோ?
போலித் தமிழும் தமிழாமோ? - வெறும்
புன்மைப் பேச்சும் பேச்சாமோ?
கூலிப் பிழைப்பும் பிழைப்பாமோ? - ஒரு
கொள்கைச் சிதைவும் சிறப்பாமோ?
கீழ்மைப் பேச்சும் தமிழாமோ? - சிறு
கிறுக்குத் தனமும் அறிவாமோ?
தாழ்மைச் செயலால் பிழையுரையால் - செந்
தமிழைக் கொல்லும் மூடர்களே!
-1980