நமச்சிவாயத்திருப்பதிகம்
-
-
-
-
-
இவ்வடிவில் பதிவிறக்குக
திருஞானசம்பந்தர் பாடியது
மூன்றாந் திருமுறை
பண்- நட்டபாடை
- (அஞ்செழுத்துண்மை)
பாடல்: 01 (காதலாகி)[தொகு]
- காத லாகிக் கசிந்துகண் ணீர்மல்கி
- ஓதுவார்தமை நன்னெறிக் குய்ப்பது
- வேத நான்கினு மெய்ப்பொரு ளாவது
- நாத னாம நமச்சி வாயவே. (01)
பாடல்: 02 (நம்புவார்)[தொகு]
- நம்பு வார்நமர் நாவி னவிற்றினால்
- வம்பு நாண்மலர் வார்மது வொப்பது
- செம்பொ னார்தில கம்முல குக்கெலாம்
- நம்ப னாம நமச்சி வாயவே. (02)
பாடல்: 03 (நெக்கு)[தொகு]
- நெக்கு ளார்வ மிகப்பெரு கிநினைந்
- தக்கு மாலைகொ டங்கையி லெண்ணுவார்
- தக்க வானவ ராய்த்தகு விப்பது
- நக்க னாம நமச்சி வாயவே. (03)
பாடல்: 04 (இயமன்)[தொகு]
- இயமன் றூதரு மஞ்சுவ ரின்சொலால்
- நயம்வந் தோதவல் லார்தமை நண்ணினால்
- நியமந் தானினை வார்க்கினி யானெற்றி
- நயன னாம நமச்சி வாயவே. (04)
பாடல்: 05 (கொல்வாரேனுங்)[தொகு]
- கொல்வா ரேனுங் கணம்பல நன்மைகள்
- இல்லாரேனு மியம்புவ ராயிடின்
்:எல்லாத் தீங்கையு நீங்குவ ரென்பரால்
- நல்லார் நாம நமச்சி வாயவே. (05)
பாடல்: 06 (மந்தரம்மன)[தொகு]
- மந்த ரம்மன பாவங்கண் மேவிய
- பந்த னையவர் தாமும் பகர்வரேல்
- சிந்தும் வல்வினை செல்வமு மல்குமால்
- நந்தி நாம நமச்சி வாயவே. (06)
பாடல்: 07 (நரகமேழ்)[தொகு]
- நரக மேழ்புக நாடின ராயினும்
- உரைசெய் வாயின ராயினு ருத்திரர்
- விரவி யேபுகு வித்திடு மென்பரால்
- வரத னாம நமச்சி வாயவே. (07)
பாடல்:08 (இலங்கை)[தொகு]
- இலங்கை மன்ன னெடுத்த வடுக்கன்மேல்
- தலங்கொள் கால்விரல் சங்கர னூன்றலும்
- மலங்கி வாய்மொழி செயதவ னுய்வகை
- நலங்கொ ணாம நமச்சி வாயவே. (08)
பாடல்:09 (போதன்)[தொகு]
- போதன் போதன கண்ணனு மண்ணறன்
- பாதந் தான்முடி நேடிய பண்பராய்
- யாதுங் காண்பரி தாகிய லந்தவர்
- ஓது நாம நமச்சி வாயவே. (09)
பாடல்:10 (கஞ்சி)[தொகு]
- கஞ்சி மண்டையர் கையினுண் கையர்கள்
- வெஞ்சொன் மிண்டர் விரவில ரென்பரால்
- விஞ்சை யண்டர்கள் வேண்ட வமுதுசெய்
- நஞ்சுள் கண்ட னமச்சி வாயவே. (10)
பாடல்:11 (நந்தி)[தொகு]
- நந்தி நாம நமச்சிவா யவெனும்
- சந்தை யாற்றமிழ் ஞானசம் பந்தன்சொல்
- சிந்தை யான்மகிழ்ந் தேத்தவல் லாரெல்லாம்
- பந்த பாச மறுக்கவல் லார்களே. (11)
திருஞானசம்பந்தப்பெருமான் பாடிய நமச்சிவாயத்திருப்பதிகம் முற்றும்