பக்கம்:தமிழ் கடன்கொண்டு தழைக்குமா.pdf/14

முன்னோர் ஆக்கிய மொழியை வளம்படுத்தற்குப் பின்னோரும் புதுச்சொற்களை ஆக்குதல் வேண்டும். இங்ஙனஞ் செய்யாது பிறமொழிச் சொற்களையே வேண்டாது கடன் கொள்பவர், தானும் தேடாது. முன்னோர் தேட்டையும் கடனால் இழக்கும் முழுச்சோம்பேறியையே ஒப்பர்.
⁠தமிழ் இதுவரை கொண்ட அயற்சொற்களால் தளர்ந்ததா வளர்ந்ததா என்பதை, சில சொற்கள் வாயிலாய் ஆய்வோம்.
⁠ஆதன்,உறவி, புலம்பன் என மூன்று அருமையான தென் சொற்கள் இருப்பவும், அவை வழக்கற்று அவற்றிற்குப் பகரமாக ஆன்மா (ஆத்துமா) என்னும் வடசொல்லே வழங்கி வருகின்றது.
⁠பலகணி. சாளரம், காலதர், காற்றுவாரி என்னும் நாற்பழந் தமிழ்ச் சொற்கள் இருப்பவும் அவை வழக் கொழிந்து அவற்றிற்குப் பகரமாக 'ஜன்னல்' என்னும் போர்த்துக்கீசியச் சொல்லே வழங்கி வருகின்றது.
⁠அடுக்களை,அட்டில், ஆக்குப்புரை (கொட்டகை) சமையலறை, மடைப்பள்ளி (அரண்மனை. கோயில். மடங்களிலுள்ளது) முதலிய பல முதுதமிழ்ச் சொற்கள் இருப்பினும், அவற்றுள் முதலிரண்டும் வழக்கு வீழ்ந்து ஏனையவும் விழுமாறு, 'குசினி' என்னும் ஆங்கிலச் சொல்லும் வழங்கி வருகின்றது.
⁠வடமொழி தேவமொழியென்றும் தமிழ் தாழ்ந்த மொழியென்றும் தவறாகக் கருதி. வேண்டாதும் வரை துறையின்றியும் வழங்கிய வடசொற்களால் வழக்கு வீழ்த்தப்பட்ட தேன்சொற்கள் எண்ணிறந்தன.

10