இப்பக்கம் மெய்ப்பு பார்க்கப்பட்டுள்ளது
12
பாலஸ்தீனம்
அரசாங்கத்திற்கு ஆலோசனை கூறவும், அரசாங்கத்துடன் ஒத்துழைக்கவும் ‘ஜையோனிய ஸ்தாபனம்’ யூதர்களின் பிரதிநிதி ஸ்தாபனம் என்று அங்கீகரிக்கப் பட வேண்டும். தவிர, மேற்படி ‘யூதர்களின் தேசீய ஸ்தலம்’ ஏற்படுத்தும் விஷயத்தில் எல்லா யூதர்களின் ஒத்துழைப்பையும் பெற அரசாங்கம் முயற்சிக்க வேண்டும். யூதர்கள் தகுந்த நிலைமைகளில் குடிபுகுவதற்கு அனுகூலங்கள் செய்து கொடுக்கப்பட வேண்டும். அரசாங்கத்திற்குச் சொந்தமான நிலங்களிலும், கரம்பு நிலங்களிலும், யூதர்கள் ஒன்று சேர்ந்து வசிப்பதற்கு ஆதரவு காட்டப்பட வேண்டும். பாலஸ்தீனத்திலேயே நிரந்தரமாக வசிக்க வேண்டுமென்று விரும்புகிற யூதர்கள், பாலஸ்தீனத்துப் பிரஜா உரிமையைப் பெற சௌகரியங்கள் செய்து கொடுக்கப் பெற வேண்டும். பொது நல சம்பந்தமான கம்பெனிகளை ஆரம்பிக்கவோ, நடத்தவோ, தேசத்தின் இயற்கைப் பொருள்களை விருத்தி செய்யவோ, மேற்படி ‘ஜையோனிய ஸ்தாபன’த்துடன் அரசாங்கம் ஏற்பாடு செய்து கொள்ளலாம்.
பாலஸ்தீனத்தின் நிருவாகத்தை, பிரிட்டன் வசம் ஒப்புவிக்கிற இந்த அதிகார பத்திரத்தில், யூதர்களுக்கு ஏன் இவ்வளவு விசேஷமான சலுகைகள் காட்டப் படவேண்டுமென்று யாருமே கேட்கக் கூடுமல்லவா?
