16 மணிமகுடம் கண் பெறட்டும் - ஊமை பேசட்டும் - உரிமை வெல்லட்டும்! ஊரும், உலகமும் வாழட்டும்! (அப்போது பொன்னழகன், புதுமைப்பித்தன், கருப்பு ரோஜா மூவரும் வருகிறார்கள்) பொன்: அல்லி - இவரைத் தெரியுமா உனக்கு? இவர் பெயர் புதுமைப் பித்தன். அல்லி: வணக்கம். புது: வணக்கம். பொன்: தற்செயலாக சந்தித்தேன். ஆனால் சந்திப்பு மிகவும் பயனுள்ளதாயிற்று! இவர் - புரட்சிக் கருத்துக்கள் கொண்டவர் - ஆட்சி பீடம் மக்கள் கைக்கு மாற வேண்டும் என்பதிலே என் கொள்கையும், மக்கள் மனவளம் பெற வேண்டும்; அப்போதுதான் அவர்கள் ஆட்சி புரியத் தகுதியுள்ளவர்கள் என்பதிலே உன் கொள்கையும் கொண்டவர். அல்லி: சுருக்கமாகச் சொல்லுங்களேன் - மொத்தமாக என் கொள்கை கொண்டவர். கருப்பு ரோஜா: மன்னிக்க வேண்டும் - தலைவர் என்னை அறிமுகப்படுத்த தவறி விட்டார் - இல்லை; மறந்து விட்டார் - நான்தான் கருப்பு ரோஜா! கிட்டதட்ட உங்கள் கொள்கையுடையவன் என்னையும் இங்கே அங்கத்தினராக... - பொன்: நான்தான் முன்பே சொன்னேனே! நீ அங்கத்தினராக இன்னும் ஆறு மாதம் செல்லும் - அதுவரை நீ வேண்டுமானால் இங்கே இருக்கலாம் - அல்லி! புதுமைப் பித்தரை நமது மன்றத்தின் அங்கத்தினராக ஆக்குவதில் எனக்கு எந்தவித ஆட்சேபணையு மில்லை... அல்லி: பிறகென்ன? மன்றத்தின் சட்ட திட்டங்களைக் கூறி விட்டீர்கள் அல்லவா?
