மகாவம்சம்

மகாவம்சம்
ஆசிரியர் மகாநாம தேரர் (பௌத்தப் பிக்கு)

உடன் புறத்திட்டங்கள்: விக்கிப்பீடியக் கட்டுரை, பொதுவக பகுப்பு, விக்கித்தரவு.

மகாவம்சம் என்பது கி.பி 3ம் ஆண்டளவில் இலங்கையில் பௌத்தம் தோன்றி நிலைபெற்றப் பின்னர், தேவநம்பியதீசனால் கட்டப்பட்ட மகாவிகாரையில் இந்தியாவில் இருந்து வருகைத் தந்த பௌத்தப் பிக்குகளும், அப்போதைய அனுராதபுர இராசதானியப் பௌத்தப் பிக்குகளும், ஏனைய விகாரைகளில் இருந்த பௌத்தப் பிக்குகளும், பௌத்தம் இந்தியாவில் தோன்றி பரவிய வரலாற்றையும், அது இலங்கைக்கு அறிமுகஞ்செய்யப்பட்டு நிலைபெற்ற வரலாற்றையும், கூடவே புத்தரையும், பௌத்த மதத்தையும், பௌத்தம் தோன்றி வளர்ந்த வடயிந்தியாவுடன் இலங்கையை தொடர்புபடுத்தியும், மக்களிடையே பரவிய அல்லது பரப்பப்பட்ட செவிவழி கதைகள் அட்டக்கத்தா எனும் பெயரில், பௌத்தத்துடன் வருகைத் தந்த வடயிந்திய மொழியான பாளி (பிராகிருதம்) மொழியில் செய்யுள் வடிவில் பாடப்பட்டு வந்தன. அவை ஒருகட்டத்தில் காலவரிசையாக ஒருங்கிணைக்கப்பட்டு அட்டகத்தா-மகாவம்சம் எனும் பெயரில் தொகுக்கப்பட்டது. அந்த அட்டகத்தா-மகாவம்ச செய்யுள்களை ஆதாரமாகக் கொண்டு இரண்டு பழம்பெரும் நூல்கள் தொகுப்பாக்கம் பெற்றன. கி.பி. 4ம் நூற்றாண்டில் தீபவம்சமும், கி.பி. 6ம் நூற்றாண்டில் மகாவம்சமும் அவைகளாகும். இதில் மகாவம்சம் நூலை தொகுத்தவர் மகாநாம தேரர் எனும் பௌத்தப் பிக்குவாவார். அவரும் அத்தொகுப்பு நூலை பாளி மொழியிலேயே தொகுத்தார். எனவே மகாவம்சம் நூலின் உரிமையாளர் மகாநாம தேரர் எனக்கொள்ளப்படுகிறது.

இந்த நூலை வில்ஹெம் கெய்கர் என்பவர் 1908ல் ஜேர்மன் மொழிக்கு மொழிபெயர்த்தார். அதன் பின்னர் 1912ம் ஆண்டில் மாபெல் ஹெய்னஸ் போட் ‎என்பவரின் உதவியுடன் ஆங்கிலத்திற்கு மொழிப்பெயர்ப்பு செய்தார். இதன் தமிழாக்க வடிவமே இந்த நூலாகும்.

மகாவம்சம் பௌத்த சிந்தனைகளுடன், பௌத்த மதத்தை முதன்மைப்படுத்தி, தற்கால அறிவியலுடன் ஒப்பிட்டு ஏற்றுக்கொள்ள முடியாத கற்பனைகள், கட்டுக்கதைகள், தொன்மங்கள் போன்றவற்றையும் கொண்டுள்ள போதும்; பௌத்தத்தின் வரலாறு, இலங்கையில் பௌத்தம் தோன்றி நிலைப்பெற்றதன் காலவரிசை, பௌத்ததிற்கு மன்னர்கள் ஆற்றிய பணிகள் போன்றவற்றை முதன்மைப் படுத்தி, பௌத்ததிற்கு ஆதரவளித்த அரசர்களை ஆதரித்து; இலங்கையில் பௌத்தம் தோன்றுவதற்கு முன்னர் கி.மு. 6ம் நூற்றாண்டு வரையான நம்பகமற்ற தொன்மக் கதைகளை உள்ளடக்கி, இலங்கையின் முதல் மன்னனான விஜயன் முதல், கி.பி. 4ம் நூற்றாண்டு ஆட்சி செய்த மகாசேனன் வரையான வரலாற்றையும் கொண்டுள்ளது. இதனால் இலங்கையின் வரலாற்றை ஆய்வுசெய்ய முற்படும் வரலாற்றாசிரியர்களுக்கும், பௌத்தமத வரலாற்றை அறிய முற்படும் வரலாற்றாசிரியர்களுக்கும் மகாவம்சம் எனும் நூலை மீளாய்வு செய்தல் அவசியமாகின்றது. அதேவேளை இலங்கையின் வரலாற்றை அறிய முற்படும் எவருக்கும் மகாவம்சம் குறித்த போதிய தெளிவு இருத்தலும் முக்கியமாகின்றது. மகாவம்சம் இலங்கையின் பௌத்த பிக்குகளால், பௌத்தம் சார்ந்து தொகுக்கப்பட்ட நூல் என்பதால், அது இலங்கை பௌத்த சிங்களவருக்கு ஆதரவான நிலையிலேயே தொகுக்கப்பட்டிருக்கிறது என்றாலும், இலங்கை தமிழரின் வரலாற்று தொன்மைப் பற்றிய எழுத்தாவணங்கள் அற்ற நிலையில், அவற்றை ஓரளவுக்கு என்றாலும் அறிந்துகொள்ள மகாவம்சம் நூலே உதவுகின்றது என்பதையும் கருத்தில் கொள்ள வேண்டும்.

இந்த மகாவம்சம் நூல் 37 அத்தியாயங்களைக் கொண்டுள்ளது. அவை ஒவ்வொன்றையும் ஒவ்வொரு துணைதலைப்புகளாக இங்கே இடப்பட்டுள்ளன.

1-5 வரையான அத்தியாயங்கள் இந்தியாவில் பௌத்தம் தோன்றிய வரலாற்றையும், புத்தரைப் பற்றிய வரலாற்றையும் உள்ளடக்கி, புத்தர் இறந்தப் பின்பும் இலங்கைக்கு வானில் வந்து சென்றது போன்ற அறிவியல் உலகில் ஏற்றுக்கொள்ள முடியாத தொன்மக் கதைகளாக உள்ளன.

6-10 வரையான அத்தியாயங்கள் இலங்கைக்கு பௌத்தம் அறிமுகமாகும் முன்னரான காலம் பற்றியது. எனினும், "புத்தர் இறக்கும் அதே திகதியில் விஜயன் இலங்கையை வந்தடைகிறான்." போன்று பௌத்தத்துடன் இலங்கையை தொடர்புபடுத்தி நம்பகமற்ற சித்திரிப்புகளாக இருப்பதையும் காணக்கிடைக்கிறது. இவ்வத்தியாயங்களிலேயே ஆரியரின் வருகை பற்றிய செய்திகளும் காணப்படுகின்றன.

10-37 வரையான அத்தியாயங்கள் இலங்கைக்கு தேவநம்பிய தீசனின் ஆட்சி காலத்தில் பௌத்தம் அறிமுகமாகியதையும், அதன் பின்னரான இலங்கையை ஆண்ட அரசர்கள், இலங்கையில் பௌத்த செல்வாக்கு, அரசர்கள் பௌத்ததிற்கு அளித்த ஆதரவு போன்ற தகவல்களை கொண்டுள்ளன. குறிப்பாக தமிழ் செங்கோல் மன்னனான எல்லாளனை போரில் வென்ற துட்டகைமுனு பற்றிய செய்திகளுக்கு முக்கியத்துவம் கொடுத்து எழுதப்பட்டுள்ளது.

உள்ளடக்கம்[தொகு]