கலைக்களஞ்சியம்/அமெரிக்கஸ் வெஸ்பூசியஸ்

அமெரிக்கஸ் வெஸ்பூசியஸ் (ஆமெரிகோ வெஸ்பூச்சி) (Amerigo Vespucci 1452-1512) இத்தாலிய நாட்டைச் சேர்ந்த ஒரு கப்பலோட்டி. 1497 க்கும் 1504 க்கும் இடையே நான்கு முறை கடல் கடந்து கப்பற் பயணம் செய்தவன் ; இருமுறை ஸ்பெயினிற்காகவும், இருமுறை போர்ச்சுகலுக்காகவும் சென்றான். இவன் தன் வாழ்க்கைக் குறிப்புக்களையும் எழுதி வைத்துள்ளான். கொலம்பஸ் 1492லேயே அமெரிக்காவை அடைந்தானாயினும், அவனுக்கு 5 ஆண்டுகளுக்குப் பிறகு அக்கண்டத்தைக் கண்டுபிடித்த வெஸ்பூசியஸ்தான் அது ஒரு புதிய கண்டம் என்றும், கொலம்பஸ் நினைத்தபடி அது இந்தியா அன்று என்றும் கூறியவன். ஆதலால் இவன் பெயரே அக்கண்டத்திற்கும் இடப்பட்டு, அமெரிக்கா என்று அழைக்கப்பட்டு வருகிறது.