மூவர்புராண சாரம்
மூவர் புராண சாரம்
[தொகு]- மூவர் என்று இங்குக் குறிக்கப்படுபவர்கள், ஆளுடைய பிள்ளை எனும் திருஞானசம்பந்தரும், ஆளுடைய அரசு எனும் திருநாவுக்கரசரும், ஆளுடைய நம்பி எனும் சுந்தரமூர்த்தியாரும் ஆவார்கள். அவர்களின் புராண வரலாறு இங்குச் சாரமாகத் தரப்படுகின்றது, பாடல் வடிவில்!
திருஞான சம்பந்தர்
[தொகு]- (எண்சீர் விருத்தம்)
- காழிநகர்ச் சிவபாத யிதயர் தந்த கவுணியர்கோ னழுதுமையாள் கருதி யூட்டும்
- ஏழிசையின் அமுதுண்டு தாளம் வாங்கி இலங்கியநித் திலச்சிவிகை யிசைய வேறி
- வாழுமுய லகனகற்றிப் பந்த ரேய்ந்து வளர்கிழிபெற் றரவின்விட மருகல் தீர்த்து
- வீழிநகர்க் காசெய்தி மறைக்கதவம் பிணித்து மீனவன்மே னியின்வெப்பு விடுவித் தாரே. (1)
- ஆரெரியிட் டெடுத்தவே டவைமுன் னேற்றி ஆற்றிலிடு மேடெதிர்போ யணைய வேற்றி
- ஓரமண ரொழியாமே கழுவி லேற்றி ஓதுதிருப் பதிகத்தா லோட மேற்றி
- காருதவு மிடிபுத்தன் றலையி லேற்றிக் காயாத பனையின்முது கனிக ளேற்றி
- ஈரமிலா வங்கமுயி ரெய்த வேற்றி இலங்குபெரு மணத்தரனை யெய்தி னாரே. (2)
திருநாவுக்கரசர்
[தொகு]- (எண்சீர் விருத்தம்)
- போற்றுதிரு வாமூரில் வேளாண் தொன்மைப் பொருவில்கொறுக் கையரதிபர் புகழ னார்பால்
- மாற்றருமன் பினில்திலத வதியா மாது வந்துதித்த பின்புமரு ணீக்கி யாரும்
- தோற்றியமண் சமயமுறு துயர நீங்கத் துணைவரரு டரவந்த சூலை நோயால்
- அரற்றருநீ ளிடரெய்திப் பாடலிபுத் திரத்தில் பாழியொழித் தரனதிகைப் பதியில் வந்தார். (1)
- வந்துதமக் கையரருளால் நீறு சாத்தி வண்டமிழா னோய்தீர்ந்து வாக்கின் மன்னாய்
- வெந்தபொடி விடம்வேழம் வேலை நீந்தி வியன் சூலங் கொடியிடபம் விளங்கச் சாத்தி
- அந்தமிலப் பூதிமக னரவு மாற்றி அருட்காசு பெற்றுமறை யடைப்பு நீக்கிப்
- புந்திமகிழ்ந் தையாற்றிற் கயிலை கண்டு பூம்புகலூர் அரன்பாதம் பொருந்தி னாரே. (2)
சுந்தரர்
[தொகு]- (எண்சீர் விருத்தம்)
- தண்கயிலை யது நீங்கி நாவ லூர்வாழ் சைவனார் சடையனார் தனயனாராய்
- மண்புகழ வருட்டுறையா னோலை காட்டி மணம்விலக்க வன்றொண்டா யதிகை சேர்ந்து
- நண்பினுட னருள்புரிய வாரூர் மேவி நலங்கிளரும் பரவைதோ ணயந்து வைகித்
- திண்குலவும் விறன்மிண்டர் திறல்கண் டேத்துந் திருத்தொண்டத் தொகையருளாற் செப்பி னாரே. (1)
- செப்பலருங் குண்டையூர் நெல்லழைத்துத் திருப்புகலூர்ச் செங்கல் செழும் பொன்னாச் செய்து
- தப்பின்முது குன்றந்தரும் பொருளாற் றிட்டுத் தடத்தெடுத்துச் சங்கிலிதோள் சார்ந்து நாதன்
- ஒப்பிறனித் தூதுவந்தா றூடு கீறி வுறுமுதலை சிறுமதலை யுமிழ நல்கி
- மெய்ப்பெரிய களிறேறி யருளாற் சேர வேந்தருடன் வடகயிலை மேவி னாரே. (2)
- முற்றும்.
- பார்க்க