நாலடியார் 2-ஆம் அதிகாரம் -இளமை நிலையாமை

சமணமுனிவர்கள் இயற்றிய நாலடியார்

1. அறத்துப்பால்: துறவறவியல்

இரண்டாம் அதிகாரம் இளமை நிலையாமை

[அதாவது, இளமைப்பருவமானது நிலைநில்லாமையாம்]

பாடல்: 11 (நரைவருமென்)

நரைவரு மென்றெண்ணி நல்லறி வாளர் நரை வரும் என்று எண்ணி நல் அறிவாளர்

குழவி யிடத்தே துறந்தார் - புரைதீரா குழவி இடத்தே துறந்தார்- புரை தீரா

மன்னா இளமை மகிழ்ந்தாரே கோலூன்றி மன்னா இளமை மகிழ்ந்தாரே கோல் ஊன்றி

யின்னாங் கெழுந்திருப் பார். (01) இன்னாங்கு எழுந்து இருப்பார்

பதவுரை

நரை= நரைதிரை; வரும் என்று= வருமென்று; எண்ணி= நினைத்து; நல்=நல்ல; அறிவாளர்=விவேகிகள்; குழவியிடத்தே= இளமைப்பருவத்தில்; துறந்தார்= மனைவாழ்க்கையை விட்டார்; புரை= குற்றம்; தீரா= நீங்காத; மன்னா=நிலைபெறாத; இளமை= இளமைப் பருவத்தை; மகிழ்ந்தார்= இச்சித்தார்; கோல்= தடியை; ஊன்றி= ஊன்றிக்கொண்டு; இன்னாங்கு= துன்பத்துடன்; எழுந்திருப்பார்= எழுந்திருப்பார்.

கருத்துரை

அறிவுடையவர்கள் நரைதிரை வருமென்று இளமைப் பருவத்தில் இல்வாழ்க்கையை விட்டார்கள்; இளமைப்பருவத்தை விரும்பினவர்கள், துன்பத்துடன் தடியூன்றி எழுந்திருப்பார்.

விசேடவுரை

அறிவாளர்- எழுவாய், துறந்தார்- பயனிலை, மகிழ்ந்தார்- எழுவாய், எழுந்திருப்பார்- பயனிலை. ஏ- அசை. தீயிற் புகைதோன்றி யழிதல் போல, இளமையும் அழிதலான் 'மன்னா இளமை' என்றார்.

பாடல்: 12 (நட்புநாரற்)

நட்புநா ரற்றன நல்லாரு மஃகினா () நட்பு நார் அற்றன நல்லாரும் அஃகினார்

ரற்புத் தளையு மவிழ்ந்தன- வுட்காணாய் ()அற்புத் தளையும் அவிழ்ந்தன- உள் காணாய்

வாழ்தலி னூதிய மென்னுண்டாம் வந்ததே () வாழ்தலின் ஊதியம் என் உண்டாம் வந்ததே

யாழ்கலத் தன்ன கலி. (02) ஆழ் கலத்து அன்ன கலி.

பதவுரை

நட்பு= உறவாகிய,

நார்= பாசங்களும்,

அற்றன= நீங்கின;

நல்லாரும்= மகளிரும்,

அஃகினார்= அன்பிற்குறைந்தார்;

அற்பு= அன்பாகிய,

தளையும்=பந்தங்களும்,

அவிழ்ந்தன= நெகிழ்ந்தன;

உள்= உன்னுள்ளே,

காணாய்= பாராய்;

ஆழ்= முழுகும்,

கலத்து அன்ன= கப்பலோசைபோல்,

கலி= உறவினர் அழுமோசை,

வந்ததே= வந்ததல்லவோ? (ஆதலால்),

வாழ்தலின்= வாழ்தலினால்,

ஊதியம்= இலாபம்,

என்= யாது,

உண்டாம்= உண்டாகும்?

கருத்துரை

கப்பலோசை போலச் சுற்றத்தார் அழுகுரலோசை வந்ததல்லவோ? ஆதலால், இல்வாழ்க்கையின் வாழ்தலினாற் பயனென்ன உண்டாகும்?

விசேடவுரை

ஊதியம்- எழுவாய்; என்னுண்டாம்- பயனிலை.

பாடல்: 13 (சொற்றளர்ந்து)

சொற்றளர்ந்து கோலூன்றிச் சோர்ந்த நடையினராய்ப் () சொல் தளர்ந்து கோல் ஊன்றிச் சோர்ந்த நடையினர் ஆய்ப்

பற்கழன்று பண்டம் பழிகாறு - மிற்செறிந்து ()பல் கழன்று பண்டம் பழி காறும்- இல் செறிந்து

காம நெறிபடருங் கண்ணினார்க் கில்லையே () காம நெறி படரும் கண்ணினார்க்கு இல்லையே

யேம நெறிபடரு மாறு. (03) ஏம நெறி படரும் ஆறு.

பதவுரை

சொல்= சொற்கள்,

தளர்ந்து= குழறி,

கோல்= தடியை,

ஊன்றி= ஊன்றிக்கொண்டு,

சோர்ந்த= தள்ளாடிய,

நடையினர் ஆய்= நடையை உடையவராய்,

பல்= பற்கள்,

கழன்று= உதிர்ந்து,

பண்டம்= உடலாகிய பண்டம்,

பழிகாறும்= பழிக்கப்படுமளவும்,

இல்= இல்வாழ்க்கையில்,

செறிந்து= நெருங்கி,

காமநெறி= ஆசைவழியே,

படரும்= நடக்கும்,

கண்ணினார்க்கு= அறிவுடையார்க்கு,

ஏமம்= தமக்குக்கோட்டையாகிய,

நெறி= நல்வழியில்,

படரும்= நடக்கும்,

ஆறு= வழி,

இல்= இல்லை.

கருத்துரை

இல்வாழ்க்கை வழியிலே நடப்பவர்கள் உயிர்க்கு நல்வாழ்க்கை வழியில்லை.

விசேடவுரை

ஆறு- எழுவாய். இல்லை- பயனிலை. ஏகாரம்- அசை.

பாடல்: 14 (தாழாத்)

தாழாத் தளராத் தலைநடுங்காத் தண்டூன்றா () தாழாத் தளராத் தலை நடுங்காத் தண்டு ஊன்றா

வீழா விறக்கு மிவண்மாட்டுங் - காழிலா ()வீழா இறக்கும் இவள் மாட்டும் - காழ் இலா

மம்மர்கொண் மாந்தர்க் கணங்காகுந் தன்கைக்கோ () மம்மர் கொள் மாந்தர்க்கு அணங்கு ஆகும் தன் கைக் கோல்

லம்மனைக்கோ லாகிய ஞான்று. (01) அம்மனைக் கோல் ஆகிய ஞான்று.

பதவுரை

அம்மனைக்கோல்= தன் தாய் கைக்கோலானது,

தன்கைக்கோல்= தன் கையில் கோல்,

ஆகிய ஞான்று= ஆன காலத்தில்,

தாழாத்= தாழ்ந்து,

தளரா= தளர்ந்து,

தலை= தலையை,

நடுங்கா= நடுங்கி,

தண்டு= அத்தடியை,

ஊன்றா= ஊன்றி,

வீழா= வீழ்ந்து,

இறக்கும்= மரணமாகும்,

இவள் மாட்டும்= இவளிடத்தும்,

காழ்= உறுதி,

இலா= இல்லாத,

மம்மர்= மயக்கம்,

கொள்= கொண்ட,

மாந்தர்க்கு= மனிதர்க்கு,

அணங்கு= துன்பம்,

ஆகும்= உண்டாகும்.

கருத்துரை

தன் தாய்க்கைக்கோலானது, தன்கைக்கோல் ஆன காலத்து வருத்தமுற்று இறக்கும் இவளிடத்து மயக்கங் கொண்டவர்களுக்குத் துன்பமுண்டாகும்.

விசேடவுரை

அம்மனைக்கோல்- இவ்விடத்து உயர்திணைக்கண் ஒற்று மிகுந்த்து செய்யுள்விகாரம். அணங்கு- எழுவாய், ஆகும்- பயனிலை. ’இவண்மாட்டும்’ என்பதை இவ்விடத்தெனப் பொருள் கூறுவாருமுளர்.

பாடல்: 15 (எனக்குத்)

எனக்குத்தா யாகியா ளென்னையீங் கிட்டுத் () எனக்குத் தாய் ஆகியாள் என்னை ஈங்கு இட்டுத்

தனக்குத்தாய் நாடியே சென்றாள்-தனக்குத்தா ()தனக்குத் தாய் நாடியே சென்றாள்- தனக்குத் தாய்

யாகி யவளு மதுவானாற் றாய்தாய்க்கொண் () ஆகியவளும் அது ஆனால் தாய் தாய்க் கொண்டு

டேகு மளித்திவ் வுலகு. (05) ஏகும் அளித்து இவ் உலகு.

பதவுரை

எனக்கு= எனக்கு,

தாய் ஆகியாள்= தாயானவள்,

என்னை= என்னை,

ஈங்கு= இவ்விடத்து,

இட்டு= பெற்றுவைத்து,

தனக்கு= தனக்கு ஒரு,

தாய்= தாயை,

நாடி= தேடி,

சென்றாள்= இறந்தாள்;

தனக்கு= அவளுக்கு,

தாய் ஆகியவளும்= தாயானவளும்,

அது ஆனால்= அத்தன்மையாளானால்,

தாய் தாய்க்கொண்டு= தாயைத் தாயைத் தேடிக்கொண்டு,

ஏகும்= போகும்,

இ உலகு= இவ்வுலகமானது,

அளித்து= ஏழைமை யுடையது.

கருத்துரை

இவ்வுலகமானது, தாயைத் தாயைத் தேடிக்கொண்டு போகும் ஏழைமை யுடையது.

விசேடவுரை

‘தாய் தாய்க்கொண்டு’ ? இவ்விடத்து உயர்திணை மெய்யீறு ஒற்றுக்கண் மிக்கான செய்யுள் விகாரம். உலகு- எழுவாய், அளித்து- பயனிலை. ஏ-அசை. அளித்து- பெற்றுவைத்து எனினுமாம்.

பாடல் 16 (வெறியயர்)

வெறியயர் வெங்களத்து வேன்மகன் பாணி () வெறி அயர் வெம் களத்து வேல் மகன் பாணி

முறியார் நறுங்கண்ணி முன்னர்த்- தயங்க ()முறி ஆர் நறும் கண்ணி முன்னர்த்- தயங்க

மறிகுள குண்டன்ன மன்னா மகிழ்ச்சி () மறி குளகு உண்டு அன்ன மகிழ்ச்சி

யறிவுடை யாளர்க ணில். (06) அறிவுடையாளர் கண் இல்.

பதவுரை

வெறி= வெறியாடலை,

அயர்= செய்கின்ற,

வெம்= வெய்ய,

களத்து= பலிக்களத்து,

வேல்மகன்= பூசாரி,

பாணி= கையில்,

முறி= தளிர்,

ஆர்= நிறைந்த,

நறும்= மணக்கும்,

கண்ணி= மாலை,

முன்னர்= தன் முன்னாக,

தயங்க= அசைந்து தொங்க,

மறி= ஆடு,

குளகு= உணவாக,

உண்டன்ன= உண்டாற்போலும்,

மன்னா= நிலைபெறாத,

மகிழ்ச்சி= இளமையினான் ஆகும் மகிழ்ச்சி,

அறிவுடையார்கண்= விவேகிகளிடத்தில்,

இல்= இல்லை.

கருத்துரை

ஆடுகொண்ட மகிழ்ச்சி அறிவுடையாளர்களிடத்தில் இல்லை.

விசேடவுரை

மகிழ்ச்சி- எழுவாய், இல்- பயனிலை. மறியின் மகிழ்ச்சி கணம்போதேனு நில்லாமை பற்றி ‘மன்னா’ என்றார்.

பாடல் 17 (பனிபடு)

பனிபடு சோலைப் பயன்மர மெல்லாங் () பனி படு சோலைப் பயன் மரம் எல்லாம்

கனியுதிர்ந்து வீழ்ந்தற் றிளமை- நனிபெரிதும் ()கனி உதிர்ந்து வீழ்ந்தற்று இளமை- நனி பெரிதும்

வேற்கண்ண ளென்றிவளை வெஃகன்மின் மற்றிவளுங் () வேல் கண்ணள் என்று இவளை வெஃகன்மின் மற் றிவளுங்

கோற்கண்ண ளாகுங் குனிந்து (07) கோல் கண்ணள் ஆகும் குனிந்து.

பதவுரை

இளமை= இளமைப்பருவமானது,

பனி= குளிர்ச்சி,

படு= பொருந்திய,

சோலை= சோலையில்,

பயன்= பலனைத்தரும்,

மரம் எல்லாம்= எல்லா மரங்களிலும்,

கனி= பழங்கள்,

உதிர்ந்து= உதிர்ந்து,

வீழ்ந்தற்று= விழுந்தாற் போலும்; (ஆதலால்),

நனி= மிக,

பெரிதும்= பெரிய,

வேல்= வேலை நிகர்த்த,

கண்ணள் என்று= கண்களையுடையவள் என்று,

இவளை= இப்பெண்ணை,

வெஃகன்மின்= இச்சியாதிருங்கள்,

மற்று இவளும்= பின்பு இப்பெண்ணும்,

குனிந்து= கூனியாகி,

கோல்= கோலையே,

கண்ணள் ஆகும்= கண்ணாக வுடையவள் ஆவாள்.

கருத்துரை

இளமைப் பருவமானது, மரங்களிற் பழங்களுதிர்ந்தாற்போலும். ஆதலால், வேலொத்த கண்களையுடையவள் என்று இவளையிச்சியாதிருங்கள். இவளும் கூனியாகிக் கோலையே கண்ணாகக்கொண்டு திரிவாள்.

விசேடவுரை

தொல்காப்பியம்

"வினையின் றொகுதி காலத் தியலும்"

நீவிர்-தோன்றா எழுவாய், வெஃகன்மின்- பயனிலை, இவளை- செயப்படுபொருள்.

பாடல் 18 (பருவமெனைத்)

பருவ மெனைத்துள பல்லின் பாலேனை () பருவம் எனைத்து உள பல்லின் பால் ஏனை

யிருசிகையு முண்டீரோ வென்று- வரிசையா ()இரு சிகையும் உண்டீரோ என்று- வரிசையால்

லுண்ணாட்டங் கொள்ளப் படுதலால் யாக்கைக்கோ () உள் நாட்டம் கொள்ளப்படுதலால் யாக்கைக் கோள்

ளெண்ணா ரறிவுடை யார். (08) எண்ணார் அறிவுடையார்.

பதவுரை

பருவம்= வயது,

எனைத்து= எவ்வளவு,

உள= உண்டாயிருக்கின்றன?

பல்லின்= பற்களினுடைய,

பால்= வலிமைப்பகுதி,

ஏனை= எவ்வளவு?

இருசிகையும்= வன்மையான பதார்த்தங்களையும், மென்மையான பதார்த்தங்களையும்,

உண்டீரோ என்று= புசித்தீரோ எனக்கேட்டு,

வரிசையால்= முறைமையாக,

உள்= உங்களுள்ளம்,

நாட்டம்= ஆராய்ச்சி,

கொள்ளப்படுதலால்= பிறரால் செய்யப்படுதலால்,

யாக்கை= உடலினது,

கோள்= கொள்கையை,

அறிவுடையார்= விவேகமுடையார்,

எண்ணார்= பொருளாக நினையார்.

கருத்துரை

வயது எவ்வளவு? பற்களின் பலன் எவ்வளவு? வலிய பதார்த்தங்களையும் உண்டீரோ? என்று கிரமமாய் உங்கள் உள்ளம் பிறராலாராய்ச்சி கொள்ளப்படுதலால் உடலின் கொள்கையை விவேகிகள் பொருளாக எண்ணார்கள்.

விசேடவுரை

அறிவுடையார்- எழுவாய், எண்ணார்- பயனிலை, கோள்- செயப்படுபொருள்.

பாடல் 19 (மற்றறிவா)

மற்றறிவா நல்வினை யாமிளைய மென்னாது () மற்று அறிவாம் நல்வினை யாம் இளையம் என்னாது

கைத்துண்டாம் போழ்தே கரவா - தறஞ்செய்ம்மின் ()கைத்து உண்டாம் போழ்தே கரவாது - அறம் செய்ம்மின்

முற்றி யிருந்த கனியொழியத் தீவளியா () முற்றி இருந்த கனி ஒழியத் தீ வளியால்

னற்கா யுதிர்தலு முண்டு. (01) நல் காய் உதிர்தலும் உண்டு.

பதவுரை

முற்றி= முதிர்ந்து,

இருந்த= இருந்த,

கனி= பழங்கள்,

ஒழிய= நீங்க,

தீவளியால்= தீக்காற்றால்,

நல்= நல்ல,

காய்= காய்கள்,

உதிர்தலும்= விழுதலும்,

உண்டு= உண்டு ஆதலால்,

நல்வினை= தருமத்தை,

மற்று= இனிமேல்,

அறிவாம்= அறிந்து செய்வோம்,

யாம்= நாம்,

இளையம்= இளமை வயதுடையோம்,

என்னாது= என்று நினையாது,

கைத்து= திரவியம்,

உண்டாம்= உண்டாயிருக்கும்,

போழ்தே= காலத்திலேயே,

கரவாது= ஒளிக்காமல்,

அறம்= தருமத்தை,

செய்ம்மின்= செய்யுங்கள்.

கருத்துரை

தீக்காற்றால் பழங்களன்றிக் காய்களுதிர்தலும் உண்டு; ஆகையால், தருமத்தைப் பின் செய்வோம் என்று நினையாது பொருள் உள்ளபொழுதே செய்யுங்கள்.

விசேடவுரை

நீங்கள்- தோன்றா எழுவாய், செய்ம்மின்- பயனிலை, அறம்- செயப்படுபொருள்.

பாடல் 20 (ஆட்பார்த்)

ஆட்பார்த் துழலு மருளில்கூற் றுண்மையால் () ஆள் பார்த்து உழலும் அருள் இல் கூற்று உண்மையால்

தோட்கோப்புக் காலத்திற் கொண்டுய்ம்மின் - பீட்பிதுக்கிப் ()தோள் கோப்புக் காலத்தில் கொண்டு உய்ம்மின் - பீள் பிதுக்கிப்

பிள்ளையைத் தாயலறக் கோடலான் மற்றதன் () பிள்ளையைத் தாய் அலறக் கோடலான் மற்று அதன்

கள்ளங் கடைப்பிடித்த னன்று. (01) கள்ளம் கடைப்பிடித்தல் நன்று.

பதவுரை

ஆள்= ஆளை,

பார்த்து= பார்த்து,

உழலும்= திரியும்,

அருள்= தயை,

இல்= இல்லாத,

கூற்று= இயமன்,

உண்மையால்= இருக்கின்றான் ஆதலால்,

தோள் கோப்பு= கட்டமுதாகிய (தருமத்தை),

இளமையில்= இளமைப்பருவத்தில்,

கொண்டு= தேடிக்கொண்டு,

உய்ம்மின்= பிழையுங்கள்;

பீள்= கருப்பத்தை,

பிதுக்கி= பிதுங்கச்செய்து,

தாய்= தாயானவள்,

அலற= அழ,

பிள்ளையை= சிசுவை,

கோடலால்= கொள்ளுதலால்,

அதன்= அவ் இயமனது,

கள்ளம்= வஞ்சத்தை,

கடைப்பிடித்தல்= உறுதியாய் அறிந்துகொள்ளுதல்,

நன்று= நல்லது.

கருத்துரை

இயமன் இருக்கிறபடியால் தருமத்தை இளமைப் பருத்திற்செய்து பிழையுங்கள், தாய் அழப் பிள்ளையைக் கொண்டு போதலால், அவன் வஞ்சத்தை உறுதியாக அறிந்து கொள்ளுதல் உத்தமம்.

விசேடவுரை

அகத்தியம்

"மின்னீறு பலர்பால் வினையொடு முடிமே.’

கடைப்பிடித்தல்= எழுவாய், நன்று- பயனிலை. மற்று- அசை.

பார்க்க

நாலடியார்- வேதகிரி முதலியாரவர்கள் உரையுடன்

நாலடியார் 1-ஆம் அதிகாரம் -செல்வ நிலையாமை

நாலடியார் 3-ஆம் அதிகாரம் - யாக்கை நிலையாமை

நாலடியார் 4-ஆம் அதிகாரம் - அறன் வலியுறுத்தல்

நாலடியார் 5-ஆம் அதிகாரம் - தூய்தன்மை

நாலடியார் 6-ஆம் அதிகாரம் - துறவு

[[]]:[[]]

[[]]

[[]]

[[]]

[[]] :[[]] :[[]]