சமணமுனிவர்கள் இயற்றிய நாலடியார்

உரை: களத்தூர் வேதகிரி முதலியார்

II.பொருட்பால்: 1.அரசியல்

[அஃதாவது, பொருளினுடைய பகுப்பாம்]

இருபதாம் அதிகாரம் தாளாண்மை

[அஃதாவது, முயற்சி செய்தலாம்]

பாடல்: 191 (கோளாற்றக்)

கோளாற்றக் கொள்ளாக் குளத்தின்கீழ்ப் பைங்கூழ்போற் || கோள் ஆற்ற கொள்ளா குளத்தின் கீழ் பைம் கூழ் போல்
கேளீவ துண்டு கிளைகளோ துஞ்சுப || கேள் ஈவது உண்டு கிளைகளோ - துஞ்சுப
வாளாடு கூத்தியர் கண்போற் றடுமாறுந் || வாள் ஆடு கூத்தியர் கண் போல் தடுமாறும்
தாளாளர்க் குண்டோ தவறு. (01) || தாளாளர்க்கு உண்டோ தவறு. (191)

பதவுரை:

கோள்= நீர்கொள்ளுதல்

ஆற்ற = மிகவும்,

கொள்ளா = கொள்ளாத

குளத்தின் கீழ் = குளத்தின் கீழே

பைங்கூழ் போல் = பசிய பயிர்போல

கேள் = இனத்தார்

ஈவது = கொடுப்பதை,

உண்டு = புசித்து,

கிளைகள் = இனத்தார்,

துஞ்சுப = வருந்துவர்;

வாள் ஆடு = வாள்கொண்டு சுழற்றும்,

கூத்தியர் = கூத்தாடுவோர்,

கண்போல் = கண்களைப் போல,

தடுமாறும் = புடைபெயர்ந்து நிற்கும்,

தாளாளர்க்கு = முயற்சி செய்வார்க்கு,

தவறு = பொருள் முட்டுப்பாடு,

உண்டோ = இல்லை.

கருத்துரை:

முயற்சி செய்வார்க்கு யாதொரு குறைவுமில்லை.

விசேடவுரை:

கிளைகள் - எழுவாய், துஞ்சுப - பயனிலை. தவறு - எழுவாய், உண்டோ - பயனிலை. ஓ - அசை.

பாடல்: 192 (ஆடுகோடாகி)

ஆடுகோ டாகி யதரிடை நின்றதூஉங் || ஆடு கோடு ஆகி அதர் இடை நின்றதூஉம்
காழ்கொண்ட கண்ணே களிறணைக்குங் கந்தாகும் || காழ் கொண்ட கண்ணே களிறு அணைக்கும் கந்து ஆகும்
வாழ்தலு மன்ன தகைத்தே யொருவன்றான் || வாழ்தலும் அன்ன தகைத்தே ஒருவன் தான்
றாழ்வின்றித் தன்னைச் செயின். (02) || தாழ்வு இன்றி தன்னை செயின். (192)

பதவுரை:

ஆடு = அசைகின்ற,

கோடு ஆகி = கொம்பாகி

அதரிடை = வழியிடத்து

நின்றதூஉம் = நின்ற இளமரமும்

காழ் = வைரம் கொண்ட

கண்ணே = இடத்தே

களிறு = யானையை

அணைக்கும் = சேர்த்துக் கட்டும்

கந்து ஆகும் = தறியாகி விடும்;

ஒருவன் = ஒருவன்

தாழ்வு = தாழ்ச்சி

இன்றி = இல்லாமல்

தன்னை செயின் = முயற்சியில் தன்னை யாக்கிக் கொண்டால்

வாழ்தலும் = செல்வமுடையன் ஆதலும்

அன்ன தகைத்தே = அத்தன்மையாம்.

கருத்துரை:

இளைய மர முற்றினால் அதனைக்கொண்டு யானையைக் கட்டலாகும்; ஒருவன் முயற்சி செய்வானானால் வாழலாம்.

விசேடவுரை:

வாழ்தல் - எழுவாய், தகைத்து - பயனிலை. தான் - அசை, வைரத்தின் பகுதி வேரம்; இதனை வீரசோழியத்திற் காண்க.

பாடல்: 193 (உறுபுலி)

உறுபுலி யூனிரை யின்றி யொருநாட் || உறு புலி ஊன் இரை இன்றி ஒரு நாள்
சிறுதேரை பற்றியுந் தின்னு - மறிவினாற் || சிறு தேரை பற்றியும் தின்னும் - அறிவினால்
காற்றொழி லென்று கருதற்க கையினான் || கால் தொழில் என்று கருதற்க கையினால்
மேற்றொழிலு மாங்கே மிகும். (03) || மேல் தொழிலும் ஆங்கே மிகும்.

பதவுரை:

உறு = பலமுற்ற

புலி = புலியானது

ஊண் = இறைச்சியாகிய

இரை = உணவு

இன்றி = இல்லாமல்

ஒரு நாள் = ஒரு தினம்

சிறு தேரை = சிறிய தவளையை

பற்றியும் = பிடித்தும்

தின்னும் = உண்ணும்; (ஆதலால்)

அறிவினால் = அறிவால்

கால் தொழில் என்று = அற்பத் தொழிலென்று

கருதற்க = நினையாதிருக்கக் கடவன்,

கையினால் = முயற்சியால்

மேல் தொழிலும் = மேலான தொழிலும்

மிகும் = மிகும்.

கருத்துரை:

புலி, இரை இல்லாவிடில், சிறு தவளையையுந் தின்னும். ஆகையால், அற்பத் தொழிலென் றெண்ணாதே. அதுவே பெரிய தொழிலாகும்.

விசேடவுரை:

மேற்றொழில் - எழுவாய், மிகும் - பயனிலை, ஆங்கு, ஏ - அசைகள்.

பாடல்: 194 (இசையா)

இசையா தெனினு மியற்றியோ ராற்றா || இசையாது எனினும் இயற்றி ஓர் ஆற்றால்
லசையாது நிற்பதா மாண்மை - யிசையுங்காற் || அசையாது நிற்பதாம் ஆண்மை - இசையும் கால்
கண்ட றிரையலைக்குங் கானலந் தண்சேர்ப்ப || கண்டல் திரை அலைக்கும் கானலம் தண் சேர்ப்ப
பெண்டிரும் வாழாரோ மற்று. (04) || பெண்டிரும் வாழாரோ மற்று.

பதவுரை:

கண்டல் = முள்ளிச்செடியை

திரை = அலைகள்

அலைக்கும் = ஒதுக்கும்

கானலம் = உப்பளத்தையும்

தண் = குளிர்ந்த

சேர்ப்ப = கடற்கரையையுமுடைய பாண்டியனே!

இசையாது எனினும் = முயற்சி பொருந்தாவிடினும்

இயற்றி = முயற்சிசெய்து

ஓர் ஆற்றால் = ஒருவழியால்

அசையாது = தளராமல்

நிற்பதாம் = நிற்பதாகும்;

ஆண்மை = ஆண்மைத்திறம்

இசையும் கால் = முயற்சி பொருந்துமாகில்

பெண்டிரும் = பெண்பிள்ளைகளும்

வாழாரோ = ஆடவர்போல் வாழமாட்டார்களோ?

கருத்துரை:

பாண்டியனே! முயற்சி பொருந்தாவிடினும் மேன்மேலும் முயற்சிசெய்து வாழ்தல் ஆண்மைத்திறம்; முயற்சி பொருந்துமானால் பெண்பிள்ளைகளும் வாழ்வார்கள்.

விசேடவுரை:

ஆண்மை - எழுவாய், நிற்பதாம் - பயனிலை. மற்று - அசை.

பாடல்: 195 (நல்லகுல)

நல்ல குலமென்றுந் தீய குலமென்றுஞ் || நல்ல குலம் என்றும் தீய குலம் என்றும்
சொல்லள வல்லாற் பொருளில்லைத் - தொல்சிறப்பி || சொல் அளவால் பொருள் இல்லை - தொல் சிறப்பின்
னொண்பொரு ளொன்றோ தவங்கல்வி யாள்வினை || ஒண் பொருள் ஒன்றோ தவம் கல்வி ஆள்வனை
யென்றிவற்றா னாகுங் குலம். (05) || என்று இவற்றான் ஆகும் குலம்.

பதவுரை:

நல்ல குலம் என்றும் = நல்ல குலமென்றும்

தீய குலம் என்றும் = கெட்ட குலமென்றும்

சொல் அளவு அல்லால் = சொல்லும் அளவல்லாமல்

பொருள் இல்லை = யாதொரு பொருளுமில்லை;

தொல் = பழைய

சிறப்பின் = சிறப்பையுடைய

ஒண் = ஒள்ளிய

பொருள் = பொருளும்

தவம் = தவமும்

கல்வி = கல்வியும்

ஆள்வினை = முயற்சியு்

என்ற இவற்றான் = என்று சொல்லிய இவைகளால்

குலம் = குலம்

ஆகும் = மேன்மையடையும்.

கருத்துரை:

பொருள், தவம், கல்வி, தொழில் ஆகிய இவற்றால் குலம் மேன்மை யடையும்

விசேடவுரை:

குலம் - எழுவாய், ஆகும் - பயனிலை. ஒன்றோ - இடைச்சொல்.

பாடல்: 196 (ஆற்றுந்)

ஆற்றுந் துணையு மறிவினை யுள்ளடக்கி || ஆற்றுஉம் துணையும் அறிவினை உள் அடக்கி
யூக்க முரையா ருணர்வுடையார் - ஊக்க || ஊக்கம் உரையார் உணர்வு உடையார் - ஊக்கம்
முறுப்பினா லாராயு மொண்மை யுடையார் || உறுப்பினால் ஆராயும் ஒண்மை உடையார்
குறிப்பின்கீழ்ப் பட்ட துலகு. || குறிப்பின் கீழ் பட்டது உலகு.

பதவுரை:

ஆற்றும் = செய்யுங்காரியம்

துணையும் = முடியுமளவும்

அறிவினை = அறிவை

உள் அடக்கி = தம்முளடக்கி

ஊக்கம் = தம் வலிமையை

உணர்வு உடையார் = அறிவுடையார்,

உரையார் = பிறரறியச் சொல்லார்

ஊக்கம் = பிறர் வலிமையை

உறுப்பினால் = அவயவத்தால்

ஆராயும் = விசாரிக்கும்

ஒண்மை உடையார் = அறிவை யுடையவர்

குறிப்பின் கீழ் = அவர் குறிப்பினிடத்து

உலகு = உலகமானது

பட்டது = தங்கியது.

கருத்துரை: அறிவுடையோர் தமது காரியம் முடியுமளவும் தமது வலிமையைச் சொல்லார்கள், உலகு - அறிவுடையோர் குறிப்பிற் றங்கியது.

விசேடவுரை: உணர்வுடையார் - எழுவாய், உரையார் - பயனிலை. ஊக்கம் - செயப்படுபொருள்.

பாடல்: 197 (சிதலை)

சிதலை தினப்பட்ட வால மரத்தை || சிதலை தினப்பட்ட ஆல மரத்தை

மதலையாய் மற்றதன் வீழூன்றி யாங்குக் || மதலையாய் மற்று அதன் வீழ் ஊன்றியாங்கு

தலைமை தந்தைகட் டோன்றிற்றான் பெற்ற || தலைமை தந்தைகண் தோன்றின் தான் பெற்ற

புதல்வன் மறைப்பக் கெடும். (07) || புதல்வன் மறைப்ப கெடும். (197)

பதவுரை:

சிதலை = செல்,

தினப்பட்ட = தின்னப்பட்ட,

ஆலமரத்தை =ஆலமரத்தை,

அதன் = அம்மரத்தில்,

வீழ் = வீழ்ந்த விழுது,

மதலையாய் = பற்றுக்கோடாய்,

ஊன்றியாங்கு = தாங்கினாற் போல,

தந்தைகண் = தன் பிதாவிடத்து,

குதலைமை = தளர்ச்சி,

தோன்றின் = தோன்றினால்,

தான்பெற்ற = தான் ஈன்ற,

புதல்வன் = பிள்ளை,

மறைப்ப = தன் முயற்சியால் மறைக்க,

கெடும் = கெட்டுவிடும்.

கருத்துரை:

ஆலமரத்தை அதன் விழுது தாங்கினாற்போலப் பிதாவிடத்துத் தளர்ச்சி தோன்றில் பிள்ளை தாங்குவான்.

விசேடவுரை:

குதலைமை - எழுவாய், கெடும் - பயனிலை, மற்று - அசை.

பாடல்: 198 (ஈனமாயில்)

ஈனமா யில்லிருந் தின்றி விளியினு || ஈனம் ஆய் இல் இருந்து விளியினும்

மானந் தலைவருவ செய்பவோ - யானை || மானம் தலைவருவ செய்பவோ - யானை

வரிமுகம் புண்படுக்கும் வள்ளுகிர் நோன்றா || வரிமுகம் புண்படுக்கும் வள் உகிர் நோன் தாள்

ளரிமா மதுகை யவர். (08) || அரிமா மதுகையவர். (198)

பதவுரை:

யானை = யானையினது,

வரிமுகம் = புள்ளியையுடைய முகத்தை,

புண் படுக்கும் = புண் செய்யும்,

வள் = கூரிய,

உகிர் = நகத்தையும்,

நோன் தாள் = வலிய காலையுமுடைய,

அரிமா = சிங்கத்தினது,

மதுகையவர் = வலியுள்ளவர்,

ஈனம் ஆய் = இழிவாய்,

இல் இருந்து = வீட்டிலிருந்து,

இன்றி = முயற்சி யில்லாது,

விளியினும் = இறந்தாலும்,

மானம் = குற்றம்,

தலை = தம்மிடத்து,

வருவ = வருங் காரியங்களை,

செய்பவோ = செய்வாரோ?

கருத்துரை:

சிங்கம்போலும் வலிமையுள்ளவர் முயற்சி யில்லாது வீட்டிலிருந் தழியினும் குற்றமுள்ள காரியங்களைச் செய்யார்கள்.

விசேடவுரை:

மதுகையவர் - எழுவாய், செய்பவோ - பயனிலை.

பாடல்: 199 (தீங்கரும்பீ)

தீங்கரும் பீன்ற திரள்கா லுளையலரி || தீம் கரும்பு னீன்ற திரள் கால் உளை அலரி

தேங்கமழ் நாற்ற மிழந்தாஅங் - கோங்கு || தேன் கமழ் நாற்றம் இழந்து ஆஅங்கு - ஓங்கும்

முயர்குடி யுட்பிறப்பி னென்னாம் பெயர்பொறிக்கும் || உயர் குடியுள் பிறப்பின் என் ஆம் பெயர் பொறிக்கும்

பேராண்மை யில்லாக் கடை. (09) || பேர் ஆண்மை இல்லா கடை. (199)

பதவுரை:

தீம் கரும்பு = மதுரமாகிய கரும்பு,

ஈன்ற = தந்த,

திரள் = திரண்ட,

கால் = தாளினையும்,

உளை = மென்மயிர் போற் கற்றையு முடைய,

அலரி = பூ,

தேன் கமழ் = இனிய பரிமளமாகிய,

நாற்றம் = வாசனையை,

இழந்து ஆங்கு = இழந்தாற் போல,

பெயர் = தன் பெயரை,

பொறிக்கும் = எங்கும் நாட்டும்,

பேர் ஆண்மை = பெரிய முயற்சி,

இல்லாக்கடை = இல்லாவிடில்,

ஓங்கும் = ஓங்கி,

உயர் = உயர்ந்த,

குடியுள் = நற்குடியில்,

பிறப்பின் = பிறந்ததனால்,

என் = என்ன,

ஆம் = பயனுண்டாம்.

கருத்துரை:

முயற்சியினால் தன் பெயரை யெங்கும் காட்டாதவன் உயர்ந்த குடியிற் பிறந்து என்ன பயன்?

விசேடவுரை:

என் - எழுவாய், ஆம் - பயனிலை.

பாடல்: 200 (பெருமுத்)

பெருமுத் தரையர் பெரிதுவந் தீயுங் || பெரும் முத்தரையர் பெரிது உவந்து ஈயும்

கருனைச்சோ றார்வர் கயவர் - கருனையைப் || கருனை சோறு ஆர்வர் கயவர் - கருனையை

பேரு மறியார் நனிவிரும்பு தாளாண்மை || பேரும் அறியார் நனி விரும்பு தாளாண்மை

நீரு மமிழ்தாய் விடும். (10) || நீரும் அமிழ்தாய் விடும். (200)

பதவுரை:

பெரும் = பெரிய,

முத்தரையர் = மும்மண்டலங்களில் வசிப்பவர்கள்,

பெரிது = மிகவும்,

உவந்து = மகிழ்ந்து,

ஈயும் = இடும்,

கருனை = பொரிக்கறியையும்,

சோறு = சோற்றையும்,

ஆர்வர் = புசிப்பார்,

கயவர் = கீழ்மக்கள்,

கருனையை = பொறிக்கறியை,

பேரும் = பெயரும்,

அறியாதார் = அறியாதவர்,

நனி = மிகவும்,

விரும்ப = இச்சிக்கத்தக்க,

தாளாண்மை = முயற்சியில் வரும்,

நீரும் + (புல்லரிசிக்) கூழ் நீரும்,

அமிழ்து ஆய்விடும் = தமக்கு அமிருதத்தை ஒத்ததாகும்.

கருத்துரை:

கீழ்மக்கள் பிறரிடத்து உண்பர்; மேன்மக்கள் முயற்சி செய்து உண்பர்.

விசேடவுரை:

'முத்தரையர்' என்பதற்கு 'முத்தரையரென்னும் பெரிய அரசனென்றாவது' சேர சோழ பாண்டிய மண்டலங்களில் வசிப்போரென்றாவது பொருள் கொள்க. நீர் - எழுவாய், அமிழ்தாய்விடும் - பயனிலை.

இருபதாம் அதிகாரம் தாளாண்மை முற்றிற்று

நாலடியார் அரசியல் முற்றிற்று