விண்ணகமும் மண்ணகமும் ஈடிணையில் மாட்சியரே!
அண்ணல்நும் சீரார் அருள்நயனத் - தண்ணளியால்
மன்னும் உயிருய்ந்தோம் மாதவரே! மெய்வழியில்
நன்னலங்கள் பெற்றோம் நயந்து ⁠(1)

நயமார் திருநயன நன்னோக்கால் மாந்தர்க்(கு)|r}}
இயல்பாம் பிறப்பாம் இறப்பாம் - துயர்தவிர்ந்தோம்
சாலை வளவரசே! சீர்திகழும் பொன்மேனி
கோலங்காண் கண்ணன்றோ கண் ⁠(2)

இரக்கம் அடைபடுத்த ஏரார் நயனம்
சுரக்கும் அருளால் சுரராம் - பரபோகம்
எய்தத் தயைபுரிந்த எம்மான் திருத்தாளில்
பெய்துயிருய்ந் தோங்கும் பணிந்து ⁠(3)

பணிந்தோர் பிறவிப் பிணியகல நோக்கும்
அணிதிகழெங் கோமான் அருட்கண் - கணிக்கரிய
காருண்யம் பொங்கும் கலைக்கதிபர் சாலையண்ணல்
பேருரைக்கப் போமே பவம் ⁠(4)

ரோகம் தரித்திரியம் துர்மரணம் ஆற்றொண்ணாத்
தாகம் கசப்புறலாம் முத்தாபம் - மாகதியர்
சாலைதெய் வச்சீர் திகழும் திருநயனச்
சீலத்தால் தீரும் தெளி ⁠(5)

ஆயிரமாம் சூரியரும் நாணும் அருள்நயனர்
தாயின்மிக் காங்கருணைத் தெய்வத்தின் - நேயமிகும்
நோக்கொன்றால் நான்மறையும் ஆறங்க மும்தெளியும்
தேக்கும் தவச்செல்வச் சீர் ⁠(6)

திரிபுரமும் தாமெரித்தார் சீர்நோக்கால் எங்கோன்
விரிகருணை பொங்கும் விழியர் - அரியயன் மால்
ஓருருவாய் வந்தருள்செய் உத்தமர்மெய்ச் சாலையண்ணல்
சீர்பாதம் என்றும் துணை ⁠(7)

ஈடில் கருணை இலங்கும் திருநயனர்
கோடி கடந்த குருகொண்டல் - வாடாத்
தவவாய்மை மெய்வழியர் சாலையண்ணல் நோக்கம்
சிவமாக்கும் நம்மைச் சிறந்து ⁠(8)

மதிகோடி யும்நிகரில் வள்ளல் நயனம்
விதியும் எமபடரும் வீயும் - கதியருளும்
ஆண்டவர்கள் சீரார் அருட்கண் கடைக்கணித்தால்
மீண்டுய்வர் ஜீவர் விரைந்து ⁠(9)

சர்வபுவ னாதியங்கள் தாம்படைத்து வாழ்வருளும்
பர்வதமா மேரு பரமேசர் - நிர்மலர்மெய்
சாலையண்ணல் நோக்கால் சகலவரம் தந்தருள்வார்
கோலங்கண் டுய்வீர் கனிந்து ⁠(10)

திருக்கண்ணெழில் இனிது நிறைவு பெற்றது.

குரு வாழ்க! குருவே துணை!

எல்லாம் ஆண்டவர்கள் தயவு!